AP: నెల్లూరు జిల్లాకు చెందిన మంత్రి ఆనం రామనారాయణ రెడ్డి రాజకీయాల నుంచి రిటైర్ అవుతున్నారనే ప్రచారం ప్రస్తుతం జోరుగా సాగుతోంది. అయితే, ఈ వార్తలపై ఆనం రామనారాయణ రెడ్డి ఇప్పటివరకు ఎలాంటి అధికారిక ప్రకటన చేయలేదు.
ప్రస్తుతం ఆత్మకూరు ఎమ్మెల్యేగా కొనసాగుతున్న ఆనం రామనారాయణ రెడ్డి.. రాష్ట్ర దేవాదాయ శాఖ మంత్రిగా బాధ్యతలు నిర్వహిస్తున్నారు. మరోవైపు నియోజకవర్గంలో అభివృద్ధి పనులపై దృష్టి సారిస్తూ తన రాజకీయ కార్యకలాపాలను కొనసాగిస్తున్నారు.
ఆనం రామనారాయణ రెడ్డి వయసు 70 ఏళ్లు దాటడంతో వచ్చే అసెంబ్లీ ఎన్నికల్లో ఆయన పోటీ చేయడంపై రాజకీయ వర్గాల్లో చర్చ జరుగుతోంది. వయోపరిమితి కారణంగా ఆయన ఎన్నికల బరిలోకి దిగకపోవచ్చనే ప్రచారం కొంతకాలంగా వినిపిస్తోంది.
అయితే, తన అనుచరులతో మాత్రం ఆనం భిన్నంగా చెబుతున్నట్లు సమాచారం. వచ్చే ఎన్నికల్లోనూ తానే పోటీ చేస్తానని ఆయన చెప్పినట్లు తెలుస్తోంది. దీంతో రాజకీయాల నుంచి ఆయన తప్పుకోనున్నారనే ప్రచారంపై స్పష్టత రావాల్సి ఉంది.
ప్రస్తుతం మంత్రి ఆనం రామనారాయణ రెడ్డి తన నియోజకవర్గంలో యథావిధిగా కార్యక్రమాలు కొనసాగిస్తుండటంతో, రిటైర్మెంట్ వార్తలు ఎంతవరకు నిజమన్న దానిపై రాజకీయ వర్గాల్లో ఆసక్తి నెలకొంది. దీనిపై ఆయన స్వయంగా స్పందిస్తేనే పూర్తి స్పష్టత వచ్చే అవకాశం ఉంది.
