నేపాల్‌లో భారీ వరదలు తీవ్ర విషాదాన్ని మిగిల్చాయి. ఎడతెరిపి లేకుండా కురిసిన భారీ వర్షాలతో పలు ప్రాంతాలు నీట మునిగిపోగా.. వరదల కారణంగా మృతుల సంఖ్య 1,050కి చేరింది. మరోవైపు వేలాది మంది ఆచూకీ ఇప్పటికీ తెలియకపోవడంతో ఆందోళన మరింత పెరిగింది.
అధికారుల సమాచారం ప్రకారం.. 4 వేల మందికిపైగా గల్లంతైనట్లు తెలుస్తోంది. వీరిలో 583 మంది విదేశీయులు, 83 మంది భద్రతా సిబ్బంది ఉన్నారు. గల్లంతైన వారి కోసం భద్రతా దళాలు, సహాయక బృందాలు ముమ్మరంగా గాలింపు చర్యలు చేపడుతున్నాయి.
12 వేల మందికి పైగా రక్షణ
వరదల ప్రభావంతో చిక్కుకుపోయిన ప్రజలను రక్షించేందుకు నేపాల్‌ భద్రతా దళాలు పెద్ద ఎత్తున సహాయక చర్యలు చేపట్టాయి. ఇప్పటివరకు 12 వేల మందిని సురక్షిత ప్రాంతాలకు తరలించినట్లు అధికారులు వెల్లడించారు.
సహాయక చర్యల్లో భాగంగా సుమారు 21 వేల మంది భద్రతా సిబ్బంది రంగంలోకి దిగారు. గల్లంతైన వారి కోసం గాలింపు, బాధితులను సురక్షిత ప్రాంతాలకు తరలించడం, అత్యవసర సహాయం అందించడం వంటి చర్యలను వేగంగా కొనసాగిస్తున్నారు.
వరదల కారణంగా పలు ప్రాంతాల్లో సాధారణ జనజీవనం పూర్తిగా స్తంభించింది. మృతుల సంఖ్య మరింత పెరిగే అవకాశం ఉందన్న ఆందోళన వ్యక్తమవుతోంది. గల్లంతైన వారి ఆచూకీ కోసం అధికారులు నిరంతరం శ్రమిస్తున్నారు.
