తెలంగాణలో పంటలకు సాగునీరు అందక రైతులు ఇబ్బందులు పడుతున్న సమయంలో కృష్ణా జలాలను ఆంధ్రప్రదేశ్‌కు తరలిస్తున్నారని బీఆర్ఎస్ మాజీ మంత్రి, ఎమ్మెల్యే హరీశ్‌రావు ఆరోపించారు. ఈ వ్యవహారం చంద్రబాబుకు కాంగ్రెస్ ప్రభుత్వం ఇస్తున్న ‘గురుదక్షిణ’గా కనిపిస్తోందని ఆయన విమర్శించారు.
బీమా, కల్వకుర్తి ప్రాజెక్టులకు కేటాయింపులు ఉన్నప్పటికీ మోటార్లను నిలిపివేసి, ఏపీలోని వెలగొండకు నీటిని తరలిస్తున్నారని హరీశ్‌రావు అన్నారు. తెలంగాణ ప్రయోజనాలకు విరుద్ధంగా జరుగుతున్న ఈ నీటి తరలింపును ప్రభుత్వం ఎందుకు అడ్డుకోవడం లేదని ఆయన ప్రశ్నించారు.
కృష్ణా జలాల అంశంపై తమను మార్షల్స్‌తో అసెంబ్లీ నుంచి బయటకు పంపడం సమస్యకు పరిష్కారం కాదని హరీశ్‌రావు అన్నారు. తెలంగాణకు దక్కాల్సిన నీటిని కాపాడేందుకు ప్రభుత్వం చర్యలు తీసుకోవాలని డిమాండ్ చేశారు.
కృష్ణా జలాల తరలింపుపై ముఖ్యమంత్రి రేవంత్‌రెడ్డి, మంత్రి ఉత్తమ్‌కుమార్‌రెడ్డితో బహిరంగ చర్చకు సిద్ధంగా ఉన్నానని హరీశ్‌రావు సవాల్ విసిరారు. తెలంగాణ రైతుల ప్రయోజనాలను దృష్టిలో పెట్టుకుని నీటి విషయంలో ప్రభుత్వం స్పష్టమైన వైఖరి వెల్లడించాలని ఆయన కోరారు.
